Agora que tengo un ratín, ente tutoriales de wordpress, plugins y códigos nuna llingüa estranxera y voráz, aprovecho pa davos una reseña del discu qu’asoleyó la Conseyería de Cultura col motivu de la Selmana de les Lletres Asturianes entamada esti añu cola figura y la obra de Mánfer de la Llera, gran pioneru de l’espardimientu y normalización del asturianu.

Como se diz na portada’l CD son 13 cantares de 13 artistes asturianos, grupos, duos y solistes, cantando poemes del homenaxeau llangreín.

La mio aportación ye Nueche d’insomniu:

[audio:http://www.tolimorilla.com/wp-content/uploads/2011/06/06-nueche-dinsomniu-Pista-06.mp3|titles=06 nueche d’insomniu Pista 06]

Ye la versión de la II edición qu’en formatu discu-llibru asoleyamos amosando l’espectáculu músico/poéticu/teatral/ homónimu en 2005 cola collaboración d’Ediciones Ámbitu.

Los otros artistes y’l so estilu son bien conocíos na estremada escena musical asturiana, Dark la Eme, Felpeyu, Xera, Alfredo González, Anabel Santiago o Dixebra, caún y caunos, como todos, embarcaos nel so viaxe particular a la hora musicar a Mánfer, magar que tamién hai otres referencies, nun sé si menos conocíes pero igual de valioses, como la del llangreanu Xabel, con ún solu discu editáu onde ya musicara a Mánfer, o l’aportación de Xel Pereda el guitarrista de Llan de Cubel y Nacho Vegas. Herbamora (enantes Dulcamara) aporten l’arume tribal de les pandereteres y los hermanos Valle Roso l’averamientu renovau a la tonada lírica.

La pista 8 ye, quizá, l’aportación que concita más anécdotes prestoses por ser una banda de rock de los 70′ pionera nel usu del asturianu y con un fíu de Manfer na so formación. Son Renacencia

Dexo pa la fin la pista 1, l’electrofolk d’aires bretones y marcau acentu dramáticu de Sergio Rodriguez compuestu pa da-y soporte a la voz orixinal de Mánfer, sacada d’un archivu mínimu que grabamos nuna de les representaciones de Nueche d’insomniu cuando’l poeta recitó, col micrófonu nes manes y la so musa al llau, esti poema que ya yera canción (si mos ponemos petardos) que tantes alegríes me diera.

Otru saludu Mánfer!

Déxovos esti documentu sonoru de Mánfer recitando’l so poema «Nueche d’insomniu» cuando’l 9 de xineru de 2004 estrené’l espectàculu homónimu nel teatru Xovellanos de Xixón.

Escúchalu:

Mánfer vino al teatru xunto a Carlota Estrada, la so musa, como él dicía,  coles ganes y la ilusión d’un escolín de 85 años, anque ya marcau pola enfermedá que lu llevó d’esti mundu, a dalo too.

Animábame cuando-y contaba’l proyectu y les coses poníense difíciles pa llevar p’alantre tola producción del espectáculu y l’estrés facía de les suyes.

Foi un puntu d’apoyu fundamental y siempre guardo nel caxón de la memoria les sos palabres d’aliendu: «Ta mui bien Toli, nun lo dexes que meréz la pena facelo y conta-y a la xente esta historia de poetes desconocíos falando una llingüa incomprendía, nun paga la pena esmolecese coles torgues que vayan saliendo de cuando en cuando…»

Y vaya si mereció la pena. Depués de cada estrenu, fixieramos 12 representaciones n’otros tantos teatros per toa Asturies, sentíme un home enteru y satisfechu cola mirada y el coral puestos na llabor de tresmitir y non na busca de l’ésitu y esa foi una de les llecciones que enxamás podré escaecer. Una vegada más un abrazu fondu y agradecíu.