Crónica d’un conciertu anunciáu. E&P

Esta foto de Miguel Rojo (@joegroumil en tuiter) que nun ye Miguel Rojo l’autor del bestseller «Histories d’un seductor, memories d’un babayu» pero que tamién escribe n’El Comercio, define a la perfección el conciertu-presentación del xueves pasáu nel Café Trisquel.

 Foi un ésitu ensin neón, una caricia d’unes doscientes persones qu’ atascaron el local de la familia García. Dos hores y media de conciertu nel qu’hubo momentos d’emoción y rabia, algún qu’otru accidente ensin feríes y muncha, muncha enerxía positiva.

Tocar con Ángel Miguel tá convirtiendose nuna esperiencia espiritual, dalgo que va más allá de los acordes y les notes, de les melodies y arpegios. Ye tal el control que tien enrriba l’escenariu que fae que too tea bien dosificao. «L’home qu’hai en mi de toles coses ye capaz…» diz Ángel ensin falar  cuando apurre’l dobro pa tocar la Canción Mixteca.

La xente que miraba y sentía les canciones, como quien agradez un día de calor tres del iviernu más duru, facien llegar al escenariu los arumes de llugares alloñaos unos d’otros, La Pola Sieru, L’infiestu, Tapia Casariego, Avilés, Bilbao, Madrí, Proaza, Uviéu o Luarca, mecíos col golor marín d’esta ciudá que me quier na mesma midía cola que la quiero yo. Xixón nun necesita’l neón d’otres ciudaes pa ser la que, con más ésitu, entró nel mio coral.

Gracies a toos por esti golpe d’amor, salú.