Conciertu XXIX Aniversariu Café Trisquel 31May

¿Qué ye, la tercera o la cuarta? Nun sé, pero nun ye la primer vez que facemos conciertu l’aniversariu del café de la familia García.

Presentamos «Nueche d’insomniu» CD Llibru con Julio Gilsanz, otra vegada foi con Jorge Otero y tola banda, y un añu que salía Noe nel cartel, como si fuera una neña mitolóxica de dalgún universu paralelu, dalgunos que nun taben mui enteraos pensaben que yera yo.

Acuérdome cuando Ramón quiso poner nel techu’l bar el MUPI del estrenu rocambolescu nel Campoamor d»Uviéu y mangamos una escalera, garramos una grapadora pared y pasámosles putes pa igüalo.

Queríos, nun vamos a esfarraplar na señaldá, solo dicivos qu’esti xueves hai novedaes, y munches, Ángel Miguel (Real Straits) ta conmigo tocando’l dobro, la mandolina y les guitarres acústiques y tenemos repertoriu abondo de tolos discos grabaos nestos años. L’acontecimientu entama a les 20h. pero nós tocamos sobre les 22h.

El «set» entama con «Slalom Special», que ye de les que más-y presten a Ramón, y nun ye pa combayar, ye qu’asina tamos tocándolo y ye una bona casualidá como la que fizo qu’esti cantautor y estos amigos fixeran amistá. Felicidaes pol cumpleaños a la familia Trisquel García.