Conciertu Nordestada / Tapia de Casariego 15/06/14

Esti finde hai un conciertu nel llugar de Tapia de Casariego, nesti occidente asturianu que tantes vegaes fixo, na mio vida viaxera, de calmante espiritual (o namás que de placebu pal “yo turista”).

Pienso cómo facer esta entrada pero del mio cuerpu sal la emoción en forma elexía. Va tiempu que nun salgo de la ciudá…

“Col frescor de la tierra, d’esa que nun cambia, y’l calor que da’l vivir llende la mar onde la tierra cambia tolos díes, Fredo y Cachistel entamen esti segundu aniversariu del Nordestada.

Cachistel fae d’enlláz y organizador de les coses técniques y otres yerbes; Fredo prepara’l bar pa  cellebrar que pue siguir navegando, que l’aire sopla a favor metanes xunto a la truena.

Garra una semeya que-y apurrió Cachistel, una cartulina prieta y la caxa les pintures. Descarga la foto, imprímela, recorta,  garra la cola, piensa.

L’home que nun cambia taraza le máquines del home que cambia. L’artesanu.”

… y termina’l ramalazu poéticu.

Buenu, esto quier dicir qu’esti domingu tenemos un bon día pa pasar pela villa de Tapia y esfrutar d’esta fiesta d’aniversariu, esperamos qu’ensin nordestada, nel puertu, na cai El Muelle.

Vémonos en Nordestada!