A vueltes col nuevu CD “Estándar & Probes”

 

 

 

 

 

 

Esti ye un avance de la portada del primer discu recopilatoriu qu’edito en tola mio historia como cantautor.

Hay dos cares, A y B, anque físicamente nun esista nada más qu’una, esto ye asina pola diferencia qu’hai ente les 18 grabaciones qu’aparecen nesta edición. Les 9 primeres, de la cara A, tan grabaes en directo con Ángel Miguel, mirándonos les cares, nel estudiu de Sergio Rodríguez, TUTU. Estes versiones son totalmente acústiques y son lo más asemeyao a un conciertu en vivo. Tocamos guitarres, mandolina, dobro, armóniques y por supuesto la mio voz y los coros d’Ángel.

Les 9 de la cara B, son nelles mesmes 9 cares B, una esbilla d’esos cantares que quedaron perdíos pelos discos ensin volvese a tocar enxamás. Quixi rescatalos de la mugre’l tiempu y da-yos otra oportunidá.

Ya sé que pa los que ya tienen dalgún de los mios CDs puede parece-yos un refritu ensín novedaes, anque reinventar les canciones (adaptar estructures, armonía, tempo, etc.) seya otra vuelta de tuerca que m’apetecía da-y, tamién pensé en tola xente que nun conoz más que l’últimu discu “DCBDNAS” versiones de B. Dylan n’asturianu o dalguna canción suelta d’tros CDs o inclusive solo saben d’un nome que-yos suena d’oyir falar d’él.

D’otra miente, interesábame qu’el discu valiera tamién como muestra d’un conciertu en directo pa mandar a festivales, teatros, sales de conciertos y programadores culturales, pa poder facer lo que más nos presta: TOCAR.