El elefante
Tenía ganes de facer un regalu pal cumpleaños d’una amiga, anque siempre fuera un desastrosu pa eso d’acertar col bichu adecuáu, entró nunos grandes almacenes y topose con una sección onde promocionaben productos d’importación de países orientales.
Coño, equí hay algunes coses guapes, pensó viendo la mercancía que igual esta vegada podía andar más finu y quedar bien.
Alcontró palillos pa xintar, estatues de Buda, campanines, boles pal relax, figures d’animales exóticos, coño, que elefante más guapu, pensó mirando una talla maera que tenía ‘l golor antiguu y evocador del té a la lluz de la lluna o de la dama de Shangai.
Esti ye guapu, ye un bon regalu y amás nun ye mui caru, creo que-y va gustar,
camentaba cola sonrisa na boca, alegrándose de nun tener que buscar más nin miéu a fallar.
Pero el suañu la realidad fizo-y una engarradiella que nun esperaba y tornó la mueca feliz pol xestu amargu, cuando-y dio la vuelta y leyó. Product of Thailand ¡Ay madre! Pa min que estos elefantes col preciu que tienen fáenlos críos tailandeses tallando como esclavos por cuatro perres tol día, guajes explotaos hasta nun poder col alma… no, no yo esto nun lo compro.
¡Cagon diez! agora que ya taba solucionao, ¿qué voi facer?
Dio una vuelta 360 grados sobre’l so exe pa ver si volvía en sí y dexar les visiones pa coses más positives, pero viendo tola mercancía nuna sola güeyá, tovía vio más neños explotaos.
Baxaben les gotes del mugor pela frente pa baxu, cuando una llucina mermo-y la angustia fabricando una pregunta. ¿ Y si nun lo compramos? Entós tovía ye peor, porque si nun lo venden, a los guajes échenlos y queden sin trabayu, bueno van a escuela, no home non, van a trabayar a otru sitiu…o a ningunu y pasen más fame tovía…
Cagon la hostia, vaya mala suerte nacer en Tailandia y agora que faigo yo, ¿cómprolo o non?
L’aire acondicionao taba faciendo conxelar les neurones del chaval, la conciencia pegaba rebotes contra les paredes del cráneo y el probe taba fechu un lío de la virxen, ¿Agora que faigo yo?
Nun supe más del asuntu hasta que un día la amiga, que tamién lo ye de mió, contome escoyoná de risa que-y habien regalao un elefante hinchable plateau, d’esos que venden en les feries los “gitanos”, que tenía escrito:
“Made in Thailand”