Procesu
Hai unos díes tuve oyendo toles grabaciones en direutu de l’espectáculu pa escoyer les meyores tomes y volver a grabar lo que tea peor. La grabación en direutu ye un asuntu delicáu, hai que plantegalo de forma diferente al estudiu y al conciertu en sí, así que ye necesario facer un amestu entre les tomes d’un sitiu y otru y los retoques en estudiu.
Enxamás me parara a sentilo selemente, ensin prisa. Tal como lo imaxiné, apaició un día nuna caxa de teatru, como si fuera una casa de muñeques de eses piquiñines que tanto-y os gusten a los guajes.
Ye una esperiencia doble, estraña, repasar les sensaciones que fixeron la obra.
¡Cuantes coses cambiaría agora! ¡Cuantes s’escaecieron!
Descubres nesi momentu que too ta dientro d’un procesu, que formes parte d’el ensín date cuenta, aínda más, que el procesu yes tu.
Les idees mueven el mundu. Hubo un tiempu nel que les ideoloxíes moviéronlu dafechu, pero anguañu son les idees, eses que son la materia del procesu, la materia d’unu mesmu.